Kung susundin natin ang kalooban ng Diyos—bilang Kaniyang mga hinirang na hindi magtataksil sa Kaniya—hindi tayo kailanman malulugi. Ganito ang pangako ng Diyos: “Sinabi ni Yahweh: ‘Sila ang lingkod ko na aking hinirang, Kaya naman ako’y di pagtataksilan. Ang mga lingkod ko’y Aking ililigtas sa kapahamaka’t mga kahirapan’” (Isa. 63:8 mb).

Makaaasa tayo sa pagliligtas ng Diyos sa lahat ng kapahamakan at kahirapan kung mamamalagi tayong tapat na mga hinirang Niya. Ito ang dahilan kung bakit hinihikayat namin kayo na magsuri sa mga aral na sinasampalatayanan ng Iglesia Ni Cristo. Ginagawa namin ito sapagkat pinatutunayan ng Biblia na ang mga tunay na hinirang ng Diyos ay nasa loob ng iisang iglesia—ang Iglesia Ni Cristo. Hindi maiiwasan ng tao na maging hinirang ng Diyos kung nais niyang mapabuti ang buhay, lalo na sa panahong ito na napakaraming panganib sa mundo. Napakaraming tao ang napapahamak dahil sa mga sakuna, dahil sa sakit, ang iba ay dahil sa krimen. Kailangang-kailangan natin ang magliligtas sa atin sa lahat ng ito, at ang Diyos lamang ang makagagawa nito sa atin. Kaya, hindi tayo dapat tumigil sa tapat na pagsunod sa Diyos na gaya ng Kaniyang mga unang lingkod na nagsabi: “Lagi akong tatalima sa bigay mong kautusan, Susundin ko ang utos mo habang ako’y nabubuhay” (Awit 119:44 mb).

Ito rin ang dapat nating gawin ngayon—ang laging tumalima sa mga kautusan ng Diyos habang tayo ay nabubuhay. Kaya ang katapatan sa Diyos ay isang panghabambuhay na debosyon, kahit pa magdanas ng mga kapighatian at mga pagsubok.

Gawin natin ang tagubilin ng mga apostol upang magkaroon tayo ng inspirasyon na maitaguyod ang katapatan sa Diyos hanggang sa wakas. Ang sabi niya:

“Isaisip ninyo ang mga bagay na panlangit, hindi ang mga bagay na panlupa, sapagkat namatay na kayo at ang tunay na buhay ninyo’y natatago sa Diyos, kasama ni Cristo. Si Cristo ang tunay na buhay ninyo, at pag siya’y nahayag, mahahayag din kayong kasama niya at makakahati sa kanyang karangalan.” (Col. 3:2–4 mb)

Isaisip natin ang mga bagay na panlangit, hindi ang mga bagay na panlupa. Maaaring dahil sa pagsunod sa mga kalooban ng Diyos ay mawalan tayo ng buhay, subalit alalahanin natin na may isa pang buhay na inilalaan sa atin—ang tunay na buhay na natatago sa Diyos, kasama ni Cristo—doon sa langit. Mas mahalaga ang buhay na iyon kaysa buhay natin ngayon. Ang ating buhay ngayon ay mawawala sa gustuhin man natin o hindi, subalit ang buhay na inilalaan sa atin sa langit ay walang katapusan.

Kaya kung nais nating mapabuti at, higit sa lahat, magtamo ng pangakong kaligtasan, huwag tayong lilihis sa mga kautusan ng Diyos. Anuman ang ating masagupa at anuman ang mangyari sa mundo ay mamalagi tayo sa paglakad sa mga utos ng Diyos. Huwag tayong hihinto, huwag tayong lilihis, lalong huwag tayong uurong, at sa halip ay magpatuloy tayo sa pagsunod sa lahat ng utos ng Diyos hanggang sa wakas.