ANG PAGPASAKOP SA IGLESIA NI CRISTO (Church Of Christ) maoy labing mahinungdanon. Sama sa pahayag sa Ginoong Jesucristo, “… bisa’g kinsa nga musulod sa panon pinaagi kanako mamaluwas” (Juan 10:9 Revised English Bible, gihubad sa Cebuano). Ang toril o panon mao ang Iglesia Ni Cristo (Buhat 20:28 Lamsa Translation). Busa, ang Manluluwas mismo mao ang nagsugo sa mga tawo nga magpasakop sa Iglesia aron sila maluwas sa paghukom sa Dios (Roma 8:1; I Cor. 5:12–13).

Tungod ning dako kaayong kamahinungdanon sa Iglesia Ni Cristo, ang iyang mga sakop, sugyot sa gugma ug pagtagad, gipamahin ang ilang pagtoo sa dili mga sakop aron sila magpasakop usab sa Iglesia. Gibuhat nila kining maong katungdanan pinaagi sa makugihong pagpanapit sa ilang mga minahal, kahigalaan, ug mga kaila sa mga pagtoon sa Biblia; pagpanghatag kanila og mga kopya sa Pasugo: God’s Message magazine ug mga pulyeto; pagdasig kanila sa pagtan-aw ug pagpamati sa mga tulumanon sa Iglesia alang sa relihiyon sa telebisyon ug radyo, ug pag-adto sa mga opisyal nga social media accounts ug websites sa Iglesia—iglesianicristo.net, incmedia.org, ug pasugo.com.ph. Padayon nila kining gibuhat bisan niadtong panahon sa pandemya nga kanus-a ang kadaghanan nila nagpuyo lamang sa balay. Sa maong paagi, gituman nila ang ilang tinguha isip matuod nga mga Cristianos—aron magsilbe nga mga suga sa kalibutan (Mat. 5:14). Kini sumula sa pagbuot sa Dios nga ang tanang tawo makadangat sa pag-ila sa kamatuoran aron maluwas sa adlaw sa Paghukom (I Tim. 2:3–4).

Uban sa pagbaton og bahin sa mga buluhaton nga pagpakaylap, ang mga sakop sa Iglesia Ni Cristo tinuod nga nagahayag ingon sa mga suga sa kalibutan sa paagi sa ilang pagkinabuhi. Ang Ginoong Dios naglaum nga walay ikasaway ug walay mansa ang ilang pagtuman sa Iyang mga pulong o pagtulon-ang gitudlo ngadto nila. Sa gipahayag ni Apostol Pablo, “nga kamo mawalay ikasaway ug walay ikadaut, mga anak sa Dios nga walay sayup sa taliwala sa baliko ug dautang kaliwatan, uban kanila kamo modan-ag nga mga suga sa kalibutan, nga lig-ong manghawid sa pulong sa kinabuhi, aron ako adunay kalipay sa adlaw ni Cristo nga wala ako midagan nga kawang o naghago nga walay kapuslanan” (Fil. 2:15–16 NKJV, gihubad sa Cebuano).

Busa, ang matuod nga mga sakop sa Iglesia Ni Cristo dili moapil sa mga buhat nga supak sa mga pagtulun-an sa Dios bisan pa og ang maong mga buhat mao nay nahimong gawi alang sa mga tawo sa kalibutan. Dili nila tugutan ang ilang kaugalingon nga madala pinaagi sa pakigsuod ngadto sa pagbuhat sa mga makasasalang butang, sama sa pag-inom o abusar sa droga, pakighilawas gawas sa kaminyuon, panagpuyo nga dili pa kasal, pakighilawas sa magsama og kinaiyahan, malimbungon nga paagi sa pagkinabuhi, pagsugal uban sa daghan pang susamang buhat tungod kay lig-on silang nagtuo nga maghatag kini og kadaut sa ilang paglaum ug katungod sa pagbaton sa kaluwasan (I  Cor. 6:9–10).

Imbis nga mouyon sa gawi ning kalibutana nga gingitngitan sa mga makasasala nga mga buhat, ang mga sakop sa Iglesia Ni Cristo nagsunod sa gitudlo sa Ginoong Jesuscristo, “Iiwag ninyo ang inyong suga sa mga katawhan, aron makita nila ang inyong maayong mga buhat ug mahimaya ang inyong Amahan sa langit” (Mat 5:16 NKJV, gihubad sa Cebuano). Ang maayo nga gihisgutan mao ang balaod o sugo sa Ginoong Dios nga nakasulat sa Biblia (Roma 7:12).

Daw unsa ka dakong  dedikasyon sa pagtuman sa Iyang mga balaod ang gilauman sa Dios gikan sa mga matuod nga Cristianos? Nagtudlo si Apostol Pablo:

“Dili kita magakapoy sa pagbuhat og maayo. Atong madawat ang atong ganti og walay katapusang kinabuhi sa angay nga panahon. Kinahanglang dili kita moundang.” (Gal. 6:9 Easy-to-Read Version, gihubad sa Cebuano)

Dili katingad-an nga bisan unsa ang kahimtang, ang mga sakop sa Iglesia Ni Cristo kanunay tim-os sa pagtuman sa mga kasuguan sa Dios sama sa pagtambong sa mga pagsimba (Heb. 10:25), kinabubut-ong paghalad (Heb. 13:15–16), pagtabang sa mga isigkatawo sa ilang panginahanglan (Deut. 15:11), pagpamahin sa pagtoo sa mga dili pa sakop (Juan 4:28–30), ug pagpaningkamot sa pagsubay sa matarung nga paagi sa kinabuhi (Efe. 4:21–24). Nagahatag usab sila og mga pasalamat sa Dios alang sa tanang butang (I Tes. 5:18). Kini ang hinungdan, sa pagdangat sa Iglesia Ni Cristo sa kasumaran sa ika-111 ka tuig adtong Hulyo 27, 2025, ang mga sakop lukop sa kalibutan nagkahiusa sa paghalad sa kinasingkasing nga pagpasalamat ngadto sa Ginoong Dios. Dili sila magakapoy sa pagsunod sa kabalauran sa Dios, luyo sa pandemya, tungod sa pagbuhat sa ingon sila tinud-anay nga nagsilbe nga mga suga sa kalibutan.

Sama sa pamatuod sa Biblia, ang walay pagkapoy nga buhaton ang maayo sa panan-aw sa Dios dili walay ganti. Bisan og mamuhunan sila og mga sakripisyo, ang mga sakop sa Iglesia Ni Cristo dili gayud moundang sa pagtuman ning mao nilang mga tulubagon, tungod kay ang Ginoong Dios nagpiho sa Iyang saad nga, pag-abot sa gitagal nga panahon, madawat nila ang ganti sa kinabuhing dayon.