ANUMANG PAGPILI na ating ginagawa sa mundong ito ay may bahagya o dili kaya’y malaking epekto sa ating buhay—batay sa kung ano at gaano ang nakataya sa ating pagpili. Halimbawa, sa pagpapasiya kung sa aling restawran kakain o kung alin ang isusuot sa isang okasyon, anuman ang pipiliin ay kadalasang walang gaanong epekto sa ating buhay. Subalit kung ang pagpili ay may kinalaman sa pag-aasawa o sa kursong kukunin sa kolehiyo, ang magiging epekto nito ay pangmatagalan at mas malaki.

Napakahalaga, kung gayon, na maging napakaingat natin sa pagpili, lalo na kung ang nakataya ay hindi lamang ang kapakanang panlupa kundi ang nauukol sa kaligtasan ng kaluluwa.

Ang Diyos na makatarungan at mahabagin ay nagbigay sa tao ng kalayaan sa pagpili. Hindi Niya nilalang ang tao na tulad sa isang robot na de-susi o tau-tauhan, na sa ayaw o gusto ng tao, ay magiging sunud-sunuran na lamang sa iniuutos ng Diyos. Sa katunayan ay binigyan Niya ang tao ng mapagpipilian:

“Tinatawag ko sa araw na ito ang langit at lupa bilang mga saksi laban sa inyo na nagtakda ako ng buhay at kamatayan, mga pagpapala at mga sumpa. Piliin ninyo ngayon ang buhay upang mabuhay kayo at ang inyong mga anak.” (Deut. 30:19 New Pilipino Version)

Paano magagawa ng tao na piliin ang buhay at pagpapala? Idinagdag pa ng Panginoon:

“Upang ibigin ninyo ang PANGINOON ninyong Dios, makinig sa kanyang tinig at matatag na humawak sa kanya. Sapagkat ang PANGINOON ang inyong buhay at bibigyan niya kayo ng maraming taon sa lupaing ipinangako niya sa inyong mga ninunong sina Abraham, Isaac at Jacob.” (Deut. 30:20 NPV)

Kapag pinili ng tao na ibigin ang Diyos at sundin ang Kaniyang tinig sa pamamagitan ng pagsunod sa Kaniyang mga utos (I Juan 5:3 NPV), nagagawa niyang piliin ang buhay at pagpapala.  Kapag ang kaibayo naman ang kaniyang pinili, ito ay nangangahulugan ng kamatayan at sumpa—na siyang kaparusahang walang hanggan sa dagat-dagatang apoy (Apoc. 20:14).